Study Desk

For as ther is o body, and hath many membris, and alle the membris of the bodi whanne tho ben manye, ben o bodi, so also Crist.

For in o spirit alle we ben baptisid `in to o bodi, ether Jewis, ether hethene, ether seruauntis, ether free; and alle we ben fillid with drink in o spirit.

For the bodi is not o membre, but manye.

If the foot seith, For Y am not the hoond, Y am not of the bodi; not therfor it is not of the bodi.

And if the ere seith, For Y am not the iye, Y am not of the bodi; not therfor it is not of the bodi.

For oure oneste membris han nede of noon; but God tempride the bodi, yyuynge more worschip to it, to whom it failide,

that debate be not in the bodi, but that the membris be bisi in to the same thing ech for othere.

For a parti we knowun, and a parti we prophecien;

And he that spekith in tunge, spekith not to men, but to God; for no man herith. But the spirit spekith mysteries.

For he that prophecieth, spekith to men to edificacioun, and monestyng, and coumfortyng.

And Y wole, that alle ye speke in tungis, but more that ye prophecie. For he that prophecieth, is more than he that spekith in langagis; but perauenture he expoune, that the chirche take edificacioun.

For tho thingis that ben withouten soule, and yyueth voices, ethir pipe, ether harpe, but tho yyuen distinccioun of sownyngis, hou schal it be knowun that is sungun, ether that that is trumpid?

For if a trumpe yyue an vncerteyn soune, who schal make hym silf redi to batel?

So but ye yyuen an opyn word bi tunge, hou schal that that is seid be knowun? For ye schulen be spekynge in veyn.

So ye, for ye ben loueris of spiritis, seke ye that ye be plenteuouse to edificacioun of the chirche.

For if Y preye in tunge, my spirit preieth; myn vndurstondyng is with outen fruyt.

For if thou blessist in spirit, who fillith the place of an ydiot, hou schal he seie Amen on thi blessyng, for he woot not, what thou seist?

For thou doist wel thankyngis, but an othir man is not edefied.

Y thanke my God, for Y speke in the langage of alle you;

For in the lawe it is writun, That in othere tungis and othere lippis Y schal speke to this puple, and nether so thei schulen here me, seith the Lord.