Study Desk

And Y wole not now se you in my passyng, for Y hope to dwelle with you awhile, if the Lord schal suffre.

For a grete dore and an opyn is openyd to me, and many aduersaries.

And if Thimothe come, se ye that he be with out drede with you, for he worcheth the werk of the Lord, as Y.

Therfor no man dispise hym; but lede ye hym forth in pees, that he come to me; for Y abide hym with britheren.

And, britheren, Y biseche you, ye knowen the hous of Stephan, and of Fortunati, and Acaicy, for thei ben the firste fruytis of Acaie, and in to mynystrie of seyntis thei han ordeyned hem silf;

For Y haue ioie in the presence of Stephan, and of Fortunate, and Acaici;

for thei filliden that thing that failide to you; for thei han refreischid bothe my spirit and youre. Therfor knowe ye hem, that ben suche maner men.

For as the passiouns of Crist ben plenteuouse in vs, so also bi Crist oure coumfort is plenteuouse.

And whether we ben in tribulacioun, for youre tribulacioun and heelthe, ethir we ben coumfortid, for youre coumfort, ethir we ben monestid, for youre monestyng and heelthe. Which worchith in you the suffring of the same passiouns, whiche `we also suffren,

that oure hope be sad for you; witynge for as ye ben felowis of passiouns, so ye schulen ben also of coumfort.

For, britheren, we wolen that ye wite of oure tribulacioun, that was don in Asie; for ouer maner we weren greued ouer myyt, so that it anoiede vs, yhe, to lyue.

while also ye helpen in preier for vs; that of the persones of many faces of that yyuyng that is in vs, thankyngis ben don for vs bi many men to God.

For oure glorie is this, the witnessyng of oure conscience, that in symplenesse and clennesse of God, and not in fleischli wisdom, but in the grace of God, we lyueden in this world, but more plenteuousli to you.

as also ye han knowe vs a parti; for we ben youre glorie, as also ye ben oure in the dai of oure Lord Jhesu Crist.

But God is trewe, for oure word that was at you is and is not, is not ther ynne, but is is in it.

For whi Jhesus Crist, the sone of God, which is prechid among you bi vs, bi me, and Syluan, and Tymothe, ther was not in hym is and is not, but is was in hym.

For whi hou many euer ben biheestis of God, in thilke is, `that is, ben fillid. And therfor and bi hym we seien amen to God, to oure glorie.

For Y clepide God to witnesse ayens my soule, that Y sparynge you cam not ouer to Corynthe;

not that we ben lordis of youre feith, but we ben helperis of youre ioye; for thorouy bileue ye stonden.

For if Y make you sori, who is he that gladith me, but he that is soreuful of me?