Read the Bible

¹ Vir die musiekleier. 'n Psalm van Dawid.² Mag die HERE u verhoor in die dag van benoudheid! Mag die Naam van die God van Jakob u beskerm!³ Mag Hy u hulp stuur uit die heiligdom en u ondersteun uit Sion!⁴ Mag Hy dink aan al u spysoffers en u brandoffer met welgevalle aansien! Sela.⁵ Mag Hy u gee na u hart en al u voornemens vervul!

⁶ Ons wil juig oor u oorwinning en die vaandels opsteek in die Naam van onse God. Mag die HERE al u begeertes vervul!⁷ Nou weet ek dat die HERE sy gesalfde verlos; Hy sal hom verhoor uit sy heilige hemel met magtige dade van verlossing van sy regterhand.⁸ Sommige roem op strydwaens en ander op perde, maar óns sal roem op die Naam van die HERE onse God.⁹ Húlle het inmekaargesak en geval, maar óns het opgestaan en ons weer opgerig.

¹⁰ HERE, verlos die koning! Mag Hy ons verhoor op die dag as ons roep!