Read the Bible

¹ 'n Psalm van Dawid. Doen aan my reg, o HERE, want ék wandel in my opregtheid en vertrou op die HERE sonder om te wankel.² Toets my, HERE, en beproef my, keur my niere en my hart;³ want u goedertierenheid is voor my oë, en ek wandel in u waarheid.⁴ Ek sit nie by valse mense nie, en met slinkse mense gaan ek nie om nie.⁵ Ek haat die vergadering van kwaaddoeners, en by die goddelose sit ek nie.

⁶ Ek was my hande in onskuld en wil gaan rondom u altaar, o HERE,⁷ om die stem van lof te laat hoor en om al u wonders te vertel.⁸ HERE, ek het lief die woning van u huis en die woonplek van u heerlikheid.⁹ Ruk my siel nie weg saam met die sondaars en my lewe saam met die manne van bloed nie,¹⁰ in wie se hande skandelike dade is, en wie se regterhand vol is van omkopery.¹¹ Maar ék wandel in my opregtheid; verlos my en wees my genadig.¹² My voet staan op gelyk grond; ek sal die HERE loof in die vergaderings.