Read the Bible

¹ Vir die musiekleier. 'n Psalm van Dawid, ² toe die profeet Natan na hom gekom het, nadat hy by Bátseba ingegaan het. ³ Wees my genadig, o God, na u goedertierenheid; delg my oortredinge uit na die grootheid van u barmhartigheid.⁴ Was my heeltemal van my ongeregtigheid en reinig my van my sonde.⁵ Want ék ken my oortredinge, en my sonde is altyddeur voor my.⁶ Teen U alleen het ek gesondig en gedoen wat verkeerd is in u oë, sodat U regverdig kan wees as U spreek, rein as U gerig hou.

⁷ Kyk, in ongeregtigheid is ek gebore, en in sonde het my moeder my ontvang.⁸ Kyk, U het 'n welgevalle aan waarheid in die binneste, en in die verborgene maak U aan my wysheid bekend.⁹ Ontsondig my met hisop, dat ek kan rein wees; was my, dat ek witter kan wees as sneeu.¹⁰ Laat my vreugde en blydskap hoor; laat die gebeente juig wat U verbrysel het.¹¹ Verberg u aangesig vir my sondes en delg uit al my ongeregtighede.¹² Skep vir my 'n rein hart, o God, en gee opnuut in die binneste van my 'n vaste gees.¹³ Verwerp my nie van u aangesig nie en neem u Heilige Gees nie van my weg nie.

¹⁴ Gee my weer die vreugde van u heil, en ondersteun my deur 'n gewillige gees.¹⁵ Ek wil die oortreders u weë leer, dat die sondaars hulle tot U kan bekeer.¹⁶ Red my van bloedskuld, o God, God van my heil! Laat my tong u geregtigheid uitjubel.¹⁷ Here, open my lippe, dat my mond u lof kan verkondig.¹⁸ Want U het geen lus in slagoffer nie, anders sou ek dit gee; in brandoffer het U geen behae nie.¹⁹ Die offers van God is 'n gebroke gees; 'n gebroke en verslae hart sal U, o God, nie verag nie!

²⁰ Doen goed aan Sion na u welbehae; bou die mure van Jerusalem op.

²¹ Dan sal U 'n welbehae hê in die offers van geregtigheid, in brandoffer en voloffer; dan sal hulle stiere offer op u altaar.