Read the Bible

¹ 'n Lied, 'n Psalm van die kinders van Korag, Vir die musiekleier; op die wysie van: "Máhalat leannot." 'n Onderwysing van Heman, die Esrahiet. ² HERE, God van my heil, bedags roep ek, in die nag is dit voor U.³ Laat my gebed voor u aangesig kom, neig u oor tot my smeking.⁴ Want my siel is sat van teëspoede, en my lewe raak aan die doderyk.⁵ Ek word gereken by die wat in die kuil neerdaal; ek het geword soos 'n man sonder krag,⁶ vrygelaat onder die dooies, soos die wat verslaan is, wat in die graf lê, aan wie U nie meer dink nie, en wat afgesny is van u hand.⁷ U het my gesit in die kuil diep daaronder, in duisternisse, in dieptes.⁸ U grimmigheid rus op my, en U druk my neer met al u golwe. Sela.⁹ U het my bekendes ver van my verwyder, my iets afskuweliks gemaak vir hulle; ek is ingesluit en kan nie uitkom nie.

¹⁰ My oog vergaan van ellende. HERE, ek roep U aan die hele dag deur, ek brei my hande na U uit.¹¹ Kan U aan die dooies 'n wonder doen? Of kan skimme opstaan, kan hulle U loof? Sela.¹² Kan u goedertierenheid vertel word in die graf, u trou in die plek van vertering?¹³ Kan u wondermag in die duisternis bekend word en u geregtigheid in die land van vergetelheid?¹⁴ Maar ék, HERE, roep U aan om hulp, en in die môre kom my gebed U tegemoet.¹⁵ HERE, waarom verstoot U my siel, verberg U u aangesig vir my?¹⁶ Van jongs af is ek ellendig en klaar om te sterwe; ek dra u verskrikkinge, ek is radeloos.¹⁷ U toorngloed het oor my gegaan; u verskrikkinge vernietig my;¹⁸ die hele dag omring hulle my soos water, saam omsingel hulle my.

¹⁹ U het vriend en metgesel ver van my verwyder; my bekendes is duisternis.