Study Desk

For this is the tellyng, that ye herden at the bigynnyng, that ye loue ech othere;

not as Caym, that was of the yuele, and slouy his brother. And for what thing slouy he him? for hise werkis weren yuele, and hise brotheris iust.

We witen, that we ben translatid fro deeth to lijf, for we louen britheren. He that loueth not, dwellith in deth.

In this thing we han knowe the charite of God, for he puttide his lijf for vs, and we owen to putte oure lyues for oure britheren.

For if oure herte repreueth vs, God is more than oure hert, and knowith alle thingis.

and what euer we schulen axe, we schulen resseyue of hym, for we kepen hise comaundementis, and we don tho thingis that ben plesaunt bifor hym.

Moost dere britheren, nyle ye bileue to ech spirit, but preue ye spiritis, if thei ben of God; for many false prophetis wenten out in to the world.

Ye, litle sones, ben of God, and ye han ouercome hym; for he that is in you is more, than he that is in the world.

Moost dere britheren, loue we togidere, for charite is of God; and ech that loueth his brother, is borun of God, and knowith God.

He that loueth not, knowith not God; for God is charite.

In this thing the charite of God apperide in vs, for God sente hise oon bigetun sone in to the world, that we lyue bi hym.

In this thing is charite, not as we hadden loued God, but for he firste louede vs, and sente hise sone foryyuenesse for oure synnes.

In this thing we knowen, that we dwellen in hym, and he in vs; for of his spirit he yaf to vs.

In this thing is the perfit charite of God with vs, that we haue trist in the dai of dom; for as he is, also we ben in this world.

Drede is not in charite, but perfit charite puttith out drede; for drede hath peyne. But he that dredith, is not perfit in charite.

Therfor loue we God, for he louede vs bifore.

If ony man seith, that `Y loue God, and hatith his brother, he is a liere. For he that loueth not his brothir, which he seeth, hou mai he loue God, whom he seeth not?

For this is the charite of God, that we kepe hise maundementis; and his maundementis ben not heuy.

For al thing that is borun of God, ouercometh the world; and this is the victorie that ouercometh the world, oure feith.

For thre ben, that yyuen witnessing in heuene, the Fadir, the Sone, and the Hooli Goost; and these thre ben oon.