Study Desk

And thei schulen do to you these thingis, for thei han not knowun the fadir, nether me.

Y seide not to you these thingis fro the bigynnyng, for Y was with you. And now Y go to hym that sente me, and no man of you axith me, Whidur `thou goist?

but for Y haue spokun to you these thingis, heuynesse hath fulfillid youre herte.

But Y seie to you treuthe, it spedith to you, that Y go; for if Y go not forth, the coumfortour schal not come to you; but if Y go forth, Y schal sende hym to you.

Of synne, for thei han not bileued in me;

and of riytwisnesse, for Y go to the fadir, and now ye schulen not se me;

but of doom, for the prince of this world is now demed.

Yit Y haue many thingis for to seie to you, but ye moun not bere hem now.

But whanne thilke spirit of treuthe cometh, he schal teche you al trewthe; for he schal not speke of hym silf, but what euer thinges he schal here, he schal speke; and he schal telle to you tho thingis that ben to come.

He schal clarifie me, for of myne he schal take, and schal telle to you.

Alle thingis `whiche euer the fadir hath, ben myne; therfor Y seide to you, for of myne he schal take, and schal telle to you.

A litil, and thanne ye schulen not se me; and eftsoone a litil, and ye schulen se me, for Y go to the fadir.

Therfor summe of hise disciplis seiden togidere, What is this thing that he seith to vs, A litil, and ye schulen not se me; and eftsoone a litil, and ye schulen se me, for Y go to the fadir?

And Jhesus knew, that thei wolden axe hym, and he seide to hem, Of this thing ye seken among you, for Y seide, A litil, and ye schulen not se me; and eftsoone a litil, and ye schulen se me.

A womman whanne sche berith child, hath heuynesse, for hir tyme is comun; but whanne sche hath borun a sone, now sche thenkith not on the peyne, for ioye, for a man is borun in to the world.

for the fadir hym silf loueth you, for ye han loued me, and han bileued, that Y wente out fro God.

Lo! the our cometh, and now it cometh, that ye be disparplid, ech in to hise owne thingis, and that ye leeue me aloone; and Y am not aloone, for the fadir is with me.

For the wordis that thou hast youun to me, Y yaf to hem; and thei han takun, and han knowun verili, that Y wente out fro thee; and thei bileueden, that thou sentist me.

Y preie for hem, Y preye not for the world, but for hem that thou hast youun to me, for thei ben thine.

Y yaf to hem thi word, and the world hadde hem in hate; for thei ben not of the world, as Y am not of the world.