Read the Bible

¹ The `title of the hundrid and oon and fourtithe salm. The lernyng of Dauid; `his preier, `whanne he was in the denne. With my vois Y criede to the Lord; with my vois Y preiede hertli to the Lord.² I schede out my preier in his siyt; and Y pronounce my tribulacioun bifor him.³ While my spirit failith of me; and thou hast knowe my pathis. In this weie in which Y yede; proude men hidden a snare to me.

⁴ I bihelde to the riyt side, and Y siy; and noon was that knew me. Fliyt perischide fro me; and noon is that sekith my soule.⁵ Lord, Y criede to thee, Y seide, Thou art myn hope; my part in the lond of lyueris.⁶ Yyue thou tent to my biseching; for Y am maad low ful greetli. Delyuere thou me fro hem that pursuen me; for thei ben coumfortid on me.⁷ Lede my soule out of keping to knouleche to thi name; iust men abiden me, til thou yelde to me.