Read the Bible

¹ למנצח בנגינות מזמור לדוד בקראי ענני אלהי צדקי בצר הרחבת לי חנני ושמע תפלתי׃² בני איש עד מה כבודי לכלמה תאהבון ריק תבקשו כזב סלה׃³ ודעו כי הפלה יהוה חסיד לו יהוה ישמע בקראי אליו׃⁴ רגזו ואל תחטאו אמרו בלבבכם על משכבכם ודמו סלה׃⁵ זבחו זבחי צדק ובטחו אל יהוה׃

⁶ רבים אמרים מי יראנו טוב נסה עלינו אור פניך יהוה׃⁷ נתתה שמחה בלבי מעת דגנם ותירושם רבו׃⁸ בשלום יחדו אשכבה ואישן כי אתה יהוה לבדד לבטח תושיבני׃