Read the Bible

¹ שיר מזמור לאסף אלהים אל דמי לך אל תחרש ואל תשקט אל׃² כי הנה אויביך יהמיון ומשנאיך נשאו ראש׃³ על עמך יערימו סוד ויתיעצו על צפוניך׃⁴ אמרו לכו ונכחידם מגוי ולא יזכר שם ישראל עוד׃⁵ כי נועצו לב יחדו עליך ברית יכרתו׃⁶ אהלי אדום וישמעאלים מואב והגרים׃⁷ גבל ועמון ועמלק פלשת עם ישבי צור׃⁸ גם אשור נלוה עמם היו זרוע לבני לוט סלה׃

⁹ עשה להם כמדין כסיסרא כיבין בנחל קישון׃¹⁰ נשמדו בעין דאר היו דמן לאדמה׃¹¹ שיתמו נדיבמו כערב וכזאב וכזבח וכצלמנע כל נסיכמו׃¹² אשר אמרו נירשה לנו את נאות אלהים׃¹³ אלהי שיתמו כגלגל כקש לפני רוח׃¹⁴ כאש תבער יער וכלהבה תלהט הרים׃¹⁵ כן תרדפם בסערך ובסופתך תבהלם׃¹⁶ מלא פניהם קלון ויבקשו שמך יהוה׃¹⁷ יבשו ויבהלו עדי עד ויחפרו ויאבדו׃¹⁸ וידעו כי אתה שמך יהוה לבדך עליון על כל הארץ׃