Read the Bible

¹ CHORUS. Quo abiit dilectus tuus, o pulcherrima mulierum ? quo declinavit dilectus tuus ? et quæremus eum tecum.² SPONSA. Dilectus meus descendit in hortum suum ad areolam aromatum, ut pascatur in hortis, et lilia colligat.³ Ego dilecto meo, et dilectus meus mihi, qui pascitur inter lilia.⁴ SPONSUS. Pulchra es, amica mea ; suavis, et decora sicut Jerusalem ; terribilis ut castrorum acies ordinata.

⁵ Averte oculos tuos a me, quia ipsi me avolare fecerunt. Capilli tui sicut grex caprarum quæ apparuerunt de Galaad.⁶ Dentes tui sicut grex ovium quæ ascenderunt de lavacro : omnes gemellis fÅ“tibus, et sterilis non est in eis.⁷ Sicut cortex mali punici, sic genæ tuæ, absque occultis tuis.⁸ Sexaginta sunt reginæ, et octoginta concubinæ, et adolescentularum non est numerus.

⁹ Una est columba mea, perfecta mea, una est matris suæ, electa genetrici suæ. Viderunt eam filiæ, et beatissimam prædicaverunt ; reginæ et concubinæ, et laudaverunt eam.¹⁰ Quæ est ista quæ progreditur quasi aurora consurgens, pulchra ut luna, electa ut sol, terribilis ut castrorum acies ordinata ?¹¹ SPONSA. Descendi in hortum nucum, ut viderem poma convallium, et inspicerem si floruisset vinea, et germinassent mala punica.¹² Nescivi : anima mea conturbavit me, propter quadrigas Aminadab.¹³ CHORUS. Revertere, revertere, Sulamitis ! revertere, revertere ut intueamur te.