Read the Bible

¹ Respondens autem Baldad Suhites, dixit:² [Potestas et terror apud eum est,
qui facit concordiam in sublimibus suis.
³ Numquid est numerus militum ejus?
et super quem non surget lumen illius?
⁴ Numquid justificari potest homo comparatus Deo?
aut apparere mundus natus de muliere?
⁵ Ecce luna etiam non splendet,
et stellæ non sunt mundæ in conspectu ejus:
⁶ quanto magis homo putredo,
et filius hominis vermis?]