Read the Bible

¹ In anno quo ingressus est Tharthan in Azotum, cum misisset eum Sargon rex Assyriorum, et pugnasset contra Azotum et cepisset eam, ² in tempore illo locutus est Dominus in manu Isaiae filii Amos dicens: "Vade et solve saccum de lumbis tuis et calceamenta tua tolle de pedibus tuis". Et fecit sic, vadens nudus et discalceatus. ³ Et dixit Dominus: "Sicut ambulavit servus meus Isaias nudus et discalceatus tribus annis signum et portentum super Aegyptum et super Aethiopiam, ⁴ sic minabit rex Assyriorum captivos Aegypti et exsules Aethiopiae, iuvenes et senes, nudos et discalceatos, discoopertis natibus ad ignominiam Aegypti. ⁵ Et timebunt et confundentur ab Aethiopia spe sua et ab Aegypto gloria sua. ⁶ Et dicet habitator maritimae regionis huius in die illa: "Ecce, haec erat spes nostra, quo confugimus in auxilium, ut liberaremur a facie regis Assyriorum; et quomodo effugere poterimus nos?"".