Read the Bible

¹ Magistro chori. PSALMUS. David. [21:2] Domine, in virtute tua laetabitur rex et super salutare tuum exsultabit vehementer. ² [21:3] Desiderium cordis eius tribuisti ei et voluntatem labiorum eius non denegasti. ³ [21:4] Quoniam praevenisti eum in benedictionibus dulcedinis; posuisti in capite eius coronam de auro purissimo. ⁴ [21:5] Vitam petiit a te, et tribuisti ei longitudinem dierum in saeculum et in saeculum saeculi. ⁵ [21:6] Magna est gloria eius in salutari tuo, magnificentiam et decorem impones super eum; ⁶ [21:7] quoniam pones eum benedictionem in saeculum saeculi, laetificabis eum in gaudio ante vultum tuum.

⁷ [21:8] Quoniam rex sperat in Domino et in misericordia Altissimi non commovebitur. ⁸ [21:9] Inveniet manus tua omnes inimicos tuos, dextera tua inveniet, qui te oderunt. ⁹ [21:10] Pones eos ut clibanum ignis in tempore vultus tui: Dominus in ira sua deglutiet eos, et devorabit eos ignis. ¹⁰ [21:11] Fructum eorum de terra perdes et semen eorum de filiis hominum. ¹¹ [21:12] Quoniam intenderunt in te mala, cogitaverunt consilia: nihil potuerunt. ¹² [21:13] Quoniam pones eos dorsum, arcus tuos tendes in vultum eorum. ¹³ [21:14] Exaltare, Domine, in virtute tua; cantabimus et psallemus virtutes tuas.