Read the Bible

¹ Magistro chori. Filiorum Core. PSALMUS. [49:2] Audite haec, omnes gentes; auribus percipite, omnes, qui habitatis orbem: ² [49:3] quique humiles et viri nobiles, simul in unum dives et pauper! ³ [49:4] Os meum loquetur sapientiam, et meditatio cordis mei prudentiam. ⁴ [49:5] Inclinabo in parabolam aurem meam, aperiam in psalterio aenigma meum. ⁵ [49:6] Cur timebo in diebus malis, cum iniquitas supplantantium circumdabit me?

⁶ [49:7] Qui confidunt in virtute sua et in multitudine divitiarum suarum gloriantur. ⁷ [49:8] Etenim seipsum non redimet homo; non dabit Deo propitiationem suam. ⁸ [49:9] Nimium est pretium redemptionis animae eius: ad ultimum deficiet, ⁹ [49:10] ut vivat usque in finem nec videat interitum. ¹⁰ [49:11] Et videbit sapientes morientes; simul insipiens et stultus peribunt et relinquent alienis divitias suas. ¹¹ [49:12] Sepulcra eorum domus illorum in aeternum; tabernacula eorum in progeniem et progeniem, etsi vocaverunt nominibus suis terras suas. ¹² [49:13] Et homo, cum sit in honore, non permanebit; comparatus est iumentis, quae pereunt, et similis factus est illis. ¹³ [49:14] Haec via illorum, quorum fiducia in semetipsis, et finis eorum, qui complacent in ore suo. ¹⁴ [49:15] Sicut oves in inferno positi sunt, mors depascet eos; descendent praecipites ad sepulcrum, et figura eorum erit in consumptionem: infernus habitaculum eorum.

¹⁵ [49:16] Verumtamen Deus redimet animam meam, de manu inferi vere suscipiet me. ¹⁶ [49:17] Ne timueris, cum dives factus fuerit homo, et cum multiplicata fuerit gloria domus eius, ¹⁷ [49:18] quoniam, cum interierit, non sumet omnia, neque descendet cum eo gloria eius. ¹⁸ [49:19] Cum animae suae in vita ipsius benedixerit: "Laudabunt te quod benefecisti tibi", ¹⁹ [49:20] tamen introibit ad progeniem patrum suorum, qui in aeternum non videbunt lumen. ²⁰ [49:21] Homo, cum in honore esset, non intellexit; comparatus est iumentis, quae pereunt, et similis factus est illis.