Read the Bible

¹ Magistro chori. Secundum Idithun. Asaph. PSALMUS. [77:2] Voce mea ad Dominum clamavi; voce mea ad Deum, et intendit mihi. ² [77:3] In die tribulationis meae Deum exquisivi, manus meae nocte expansae sunt et non fatigantur. Renuit consolari anima mea; ³ [77:4] memor sum Dei et ingemisco, exerceor, et deficit spiritus meus. ⁴ [77:5] Vigiles tenuisti palpebras oculi mei; turbatus sum et non sum locutus. ⁵ [77:6] Cogitavi dies antiquos et annos aeternos in mente habui. ⁶ [77:7] Meditatus sum nocte cum corde meo et exercitabar et scobebam spiritum meum. ⁷ [77:8] Numquid in aeternum proiciet Deus, aut non apponet, ut complacitior sit adhuc? ⁸ [77:9] Aut deficiet in finem misericordia sua, cessabit verbum a generatione in generationem? ⁹ [77:10] Aut obliviscetur misereri Deus, aut continebit in ira sua misericordias suas? ¹⁰ [77:11] Et dixi: "Hoc vulnus meum: mutatio dexterae Excelsi".

¹¹ [77:12] Memor ero operum Domini, memor ero ab initio mirabilium tuorum. ¹² [77:13] Et meditabor in omnibus operibus tuis et in adinventionibus tuis exercebor. ¹³ [77:14] Deus, in sancto via tua; quis deus magnus sicut Deus noster? ¹⁴ [77:15] Tu es Deus, qui facis mirabilia, notam fecisti in populis virtutem tuam. ¹⁵ [77:16] Redemisti in brachio tuo populum tuum, filios Iacob et Ioseph. ¹⁶ [77:17] Viderunt te aquae, Deus, viderunt te aquae et doluerunt; etenim commotae sunt abyssi. ¹⁷ [77:18] Effuderunt aquas nubila, vocem dederunt nubes, etenim sagittae tuae transeunt. ¹⁸ [77:19] Vox tonitrui tui in rota; illuxerunt coruscationes tuae orbi terrae, commota est et contremuit terra. ¹⁹ [77:20] In mari via tua, et semitae tuae in aquis multis; et vestigia tua non cognoscuntur. ²⁰ [77:21] Deduxisti sicut oves populum tuum in manu Moysi et Aaron.