Read the Bible

¹ Magistro chori. Secundum " Lilium praecepti ". Asaph. PSALMUS. [80:2] Qui pascis Israel, intende, qui deducis velut ovem Ioseph. Qui sedes super cherubim, effulge ² [80:3] coram Ephraim, Beniamin et Manasse. Excita potentiam tuam et veni, ut salvos facias nos. ³ [80:4] Deus, converte nos, illustra faciem tuam, et salvi erimus. ⁴ [80:5] Domine, Deus virtutum, quousque irasceris super orationem populi tui? ⁵ [80:6] Cibasti nos pane lacrimarum et potum dedisti nobis in lacrimis copiose. ⁶ [80:7] Posuisti nos in contradictionem vicinis nostris, et inimici nostri subsannaverunt nos. ⁷ [80:8] Deus virtutum, converte nos, illustra faciem tuam, et salvi erimus.

⁸ [80:9] Vineam de Aegypto transtulisti, eiecisti gentes et plantasti eam. ⁹ [80:10] Purgasti locum in conspectu eius, plantasti radices eius, et implevit terram. ¹⁰ [80:11] Operti sunt montes umbra eius, et ramis eius cedri Dei; ¹¹ [80:12] extendit palmites suos usque ad mare et usque ad flumen propagines suas. ¹² [80:13] Ut quid destruxisti maceriam eius, et vindemiant eam omnes, qui praetergrediuntur viam? ¹³ [80:14] Exterminavit eam aper de silva, et singularis ferus depastus est eam. ¹⁴ [80:15] Deus virtutum, convertere, respice de caelo et vide et visita vineam istam. ¹⁵ [80:16] Et protege eam, quam plantavit dextera tua, et super filium hominis, quem confirmasti tibi. ¹⁶ [80:17] Incensa est igni et suffossa; ab increpatione vultus tui peribunt. ¹⁷ [80:18] Fiat manus tua super virum dexterae tuae, super filium hominis, quem confirmasti tibi. ¹⁸ [80:19] Et non discedemus a te, vivificabis nos, et nomen tuum invocabimus. ¹⁹ [80:20] Domine, Deus virtutum, converte nos et illustra faciem tuam, et salvi erimus.