Read the Bible

¹ Canticum. PSALMUS. Asaph. [83:2] Deus, ne quiescas, ne taceas neque compescaris, Deus, ² [83:3] quoniam ecce inimici tui fremuerunt, et, qui oderunt te, extulerunt caput. ³ [83:4] Adversus populum tuum malignaverunt consilium et cogitaverunt adversus eos, quos abscondisti tibi. ⁴ [83:5] Dixerunt: "Venite, et disperdamus eos de gente, et non memoretur nomen Israel ultra!". ⁵ [83:6] Quoniam cogitaverunt unanimiter, adversum te testamentum statuerunt: ⁶ [83:7] tabernacula Idumaeorum et Ismaelitae, Moab et Agareni, ⁷ [83:8] Gebal et Ammon et Amalec, Philistaea cum habitantibus Tyrum. ⁸ [83:9] Etenim Assur sociabatur cum illis; facti sunt in adiutorium filiis Lot.

⁹ [83:10] Fac illis sicut Madian et Sisarae, sicut Iabin in torrente Cison. ¹⁰ [83:11] Disperierunt in Endor, facti sunt ut stercus super terram. ¹¹ [83:12] Pone duces eorum sicut Oreb et Zeb et Zebee et Salmana, omnes principes eorum, ¹² [83:13] qui dixerunt: "Hereditate possideamus pascua Dei!". ¹³ [83:14] Deus meus, pone illos ut rotam et sicut stipulam ante ventum. ¹⁴ [83:15] Sicut ignis, qui comburit silvam, et sicut flamma devorans montes, ¹⁵ [83:16] ita persequeris illos in tempestate tua et in procella tua turbabis eos. ¹⁶ [83:17] Imple facies eorum ignominia, et quaerent nomen tuum, Domine. ¹⁷ [83:18] Erubescant et conturbentur in saeculum saeculi et confundantur et pereant; ¹⁸ [83:19] et cognoscant quia nomen tibi Dominus: tu solus Altissimus super omnem terram.