Read the Bible

¹ Magistro chori. Secundum " Ne destruxeris ". David. Miktam. [58:2] Numquid vere, potentes, iustitiam loquimini, recte iudicatis filios hominum? ² [58:3] Etenim in corde iniquitates operamini, in terra violentiam manus vestrae concinnant. ³ [58:4] Alienati sunt peccatores ab utero; erraverunt a ventre, qui loquuntur falsa. ⁴ [58:5] Venenum illis in similitudinem serpentis, sicut aspidis surdae et obturantis aures suas, ⁵ [58:6] quae non exaudiet vocem incantantium et venefici incantantis sapienter.

⁶ [58:7] Deus, contere dentes eorum in ore ipsorum; molas leonum confringe, Domine. ⁷ [58:8] Diffluant tamquam aqua decurrens, sicut fenum conculcatum arescant. ⁸ [58:9] Sicut limax, quae tabescens transit, sicut abortivum mulieris, quod non vidit solem. ⁹ [58:10] Priusquam sentiant ollae vestrae rhamnum, sicut viventes, sicut ardor irae absorbet eos. ¹⁰ [58:11] Laetabitur iustus, cum viderit vindictam, pedes suos lavabit in sanguine peccatoris. ¹¹ [58:12] Et dicet homo: "Utique est fructus iusto, utique est Deus iudicans eos in terra".