Read the Bible

¹ Magistro chori. Secundum " Ne destruxeris ". David. Miktam. Quando Saul viros misit, qui domum observarent et eum occiderent. [59:2] Eripe me de inimicis meis, Deus meus, et ab insurgentibus in me protege me. ² [59:3] Eripe me de operantibus iniquitatem et de viris sanguinum salva me. ³ [59:4] Quia ecce insidiati sunt animae meae, irruerunt in me fortes. ⁴ [59:5] Neque delictum neque peccatum in me est, Domine; sine iniquitate mea currunt et praeparantur. Exsurge in occursum meum et vide; ⁵ [59:6] et tu, Domine, Deus virtutum, Deus Israel, evigila ad visitandas omnes gentes; non miserearis omnibus, qui infideliter operantur. ⁶ [59:7] Revertentur ad vesperam et latrabunt ut canes et circuibunt civitatem. ⁷ [59:8] Ecce eructabunt ore suo, et gladius in labiis eorum: "Quis enim audit?".

⁸ [59:9] Et tu, Domine, deridebis eos, subsannabis omnes gentes. ⁹ [59:10] Fortitudo mea, tibi attendam, quia, Deus, praesidium meum es. ¹⁰ [59:11] Deus meus, misericordia eius praeveniet me. Deus faciet, ut despiciam inimicos meos. ¹¹ [59:12] Ne occidas eos, ne quando obliviscatur populus meus; disperge illos in virtute tua et prosterne eos, protector meus, Domine. ¹² [59:13] Peccatum oris eorum, sermo labiorum ipsorum, et comprehendantur in superbia sua. Propter exsecrationem et mendacium, quod loquuntur, ¹³ [59:14] consume eos in furore, consume, et non erunt; et scient quia Deus dominabitur Iacob et finium terrae. ¹⁴ [59:15] Revertentur ad vesperam et latrabunt ut canes et circuibunt civitatem. ¹⁵ [59:16] Ipsi errabunt ad manducandum; si vero non fuerint saturati, murmurabunt. ¹⁶ [59:17] Ego autem cantabo fortitudinem tuam et exsultabo mane misericordiam tuam, quia factus es praesidium meum et refugium meum in die tribulationis meae. ¹⁷ [59:18] Fortitudo mea, tibi psallam, quia, Deus, praesidium meum es: Deus meus misericordia mea.