Study Desk

And what if summe of hem bileueden not? Whethir the vnbileue of hem hath auoidid the feith of God?

God forbede. For God is sothefast, but ech man a liere; as it is writun, That thou be iustified in thi wordis, and ouercome, whanne thou art demed.

But if oure wickidnesse comende the riytwisnesse of God, what shulen we seie? Whether God is wickid, that bryngith in wraththe?

Aftir man Y seie. God forbede. Ellis hou schal God deme this world?

For if the treuthe of God hath aboundid in my lessyng, in to the glorie of hym, what yit am Y demed as a synner?

ther is no man vndurstondynge, nethir sekynge God.

the drede of God is not bifor her iyen.

And we witen, that what euere thingis the lawe spekith, it spekith to hem that ben in the lawe, that ech mouth be stoppid, and ech world be maad suget to God.

But now with outen the lawe the riytwisnesse of God is schewid, that is witnessid of the lawe and the profetis.

And the riytwisnesse of God is bi the feith of Jhesu Crist in to alle men and on alle men that bileuen in hym; for ther is no departyng.

For alle men synneden, and han nede to the glorie of God;

Whom God ordeynede foryyuer, bi feith in his blood, to the schewyng of his riytwisnesse, for remyssioun of biforgoynge synnes,

in the beryng up of God, to the schewyng of his riytwisnesse in this tyme, that he be iust, and iustifyynge hym that is of the feith of Jhesu Crist.

Whethir of Jewis is God oneli? Whether he is not also of hethene men? Yhis, and of hethene men.

For `oon God is, that iustefieth circumcisioun bi feith, and prepucie bi feith.

Distruye we therfor the lawe bi the feith? God forbede; but we stablischen the lawe.

For if Abraham is iustified of werkis of the lawe, he hath glorie, but not anentis God.

For what seith the scripture? Abraham bileued to God, and it was arettid to him to riytwisnesse.

As Dauid seith the blessidnesse of a man, whom God acceptith, he yyueth to hym riytwisnesse with outen werkis of the lawe,

Blessid is that man, to whom God arettide not synne.