Study Desk

Thei schulen make you with outen the synagogis, but the our cometh, that ech man that sleeth you, deme that he doith seruyce to God.

But these thingis Y spak to you, that whanne the our `of hem schal come, ye haue mynde, that Y seide to you.

but for Y haue spokun to you these thingis, heuynesse hath fulfillid youre herte.

But Y seie to you treuthe, it spedith to you, that Y go; for if Y go not forth, the coumfortour schal not come to you; but if Y go forth, Y schal sende hym to you.

but of doom, for the prince of this world is now demed.

Yit Y haue many thingis for to seie to you, but ye moun not bere hem now.

But whanne thilke spirit of treuthe cometh, he schal teche you al trewthe; for he schal not speke of hym silf, but what euer thinges he schal here, he schal speke; and he schal telle to you tho thingis that ben to come.

Treuli, treuli, Y seie to you, that ye schulen mourne and wepe, but the world schal haue ioye; and ye schulen be soreuful, but youre sorewe schal turne in to ioye.

A womman whanne sche berith child, hath heuynesse, for hir tyme is comun; but whanne sche hath borun a sone, now sche thenkith not on the peyne, for ioye, for a man is borun in to the world.

And therfor ye han now sorew, but eftsoone Y schal se you, and youre herte schal haue ioie, and no man schal take fro you youre ioie.

Y haue spokun to you these thingis in prouerbis; the our cometh, whanne now Y schal not speke to you in prouerbis, but opynli of my fadir Y schal telle to you.

These thingis Y haue spokun to you, that ye haue pees in me; in the world ye schulen haue disese, but trust ye, Y haue ouercomun the world.

Y preie for hem, Y preye not for the world, but for hem that thou hast youun to me, for thei ben thine.

While Y was with hem, Y kepte hem in thi name; thilke that thou yauest to me, Y kepte, and noon of hem perischide, but the sone of perdicioun, that the scripture be fulfillid.

But now Y come to thee, and Y speke these thingis in the world, that thei haue my ioie fulfillid in hem silf.

Y preye not, that thou take hem awei fro the world, but that thou kepe hem fro yuel.

And Y preye not oneli for hem, but also for hem that schulden bileue in to me bi the word of hem;

Fadir, riytfuli the world knew thee not, but Y knew thee, and these knewen, that thou sentist me.

But Symount Petre suede Jhesu, and another disciple; and thilke disciple was knowun to the bischop. And he entride with Jhesu, in to the halle of the bischop;

but Petre stood at the dore with outforth. Therfor `the tother disciple, that was knowun to the bischop, wente out, and seide to the womman that kepte the dore, and brouyte in Petre.