Study Desk

He that hath mercy on a pore man, leeneth to the Lord; and he schal yelde his while to hym.

A slow man hidith his hond vndur the armpit; and putteth it not to his mouth.

As the roryng of a lioun, so and the drede of the kyng; he that territh hym to ire, synneth ayens his owne lijf.

Forsothe a iust man that goith in his simplenesse, schal leeue blessid sones aftir hym.

A king that sittith in the seete of doom, distrieth al yuel bi his lokyng.

A child is vndurstondun bi hise studies, yf his werkis ben riytful and cleene.

The breed of a leesing is sweet to a man; and aftirward his mouth schal be fillid with rikenyng.

The liyt of hym that cursith his fadir and modir, schal be quenchid in the myddis of derknessis.

The steppis of man ben dressid of the Lord; who forsothe of men mai vndurstonde his weie?

Merci and treuthe kepen a kyng; and his trone is maad strong bi mekenesse.

The soule of an vnpitouse man desirith yuel; he schal not haue merci on his neiybore.

He that stoppith his eere at the cry of a pore man, schal crye also, and schal not be herd.

He that kepith his mouth and his tunge, kepith his soule from angwischis.

A wickid man makith sad his cheer vnschamefastli; but he that is riytful, amendith his weie.

Armuris and swerdis ben in the weie of a weiward man; but the kepere of his soule goith awey fer fro tho.

It is a prouerbe, A yong wexynge man bisidis his weie, and whanne he hath wexe elde, he schal not go awei fro it.

He that sowith wickidnes, schal repe yuels; and the yerde of his yre schal be endid.

He that is redi to merci, schal be blessid; for of his looues he yaf to a pore man. He that yyueth yiftis, schal gete victorie and onour; forsothe he takith awei the soule of the takeris.

For the Lord schal deme his cause, and he schal turmente hem, that turmentiden his soule.

Thou hast seyn a man smert in his werk; he schal stonde bifore kyngis, and he schal not be bifor vnnoble men.