Study Desk

The erthe was moued, for heuenes droppiden doun fro the face of God of Synay; fro the face of God of Israel.

God, thou schalt departe wilful reyn to thin eritage, and it was sijk; but thou madist it parfit.

Thi beestis schulen dwelle therynne; God, thou hast maad redi in thi swetnesse to the pore man.

the hille of God is a fat hille. The cruddid hil is a fat hil;

wherto bileuen ye falsli, cruddid hillis? The hil in which it plesith wel God to dwelle ther ynne; for the Lord schal dwelle `in to the ende.

The chare of God is manyfoold with ten thousynde, a thousynde of hem that ben glad; the Lord was in hem, in Syna, in the hooli.

Thou stiedist an hiy, thou tokist caitiftee; thou resseyuedist yiftis among men. For whi thou tokist hem that bileueden not; for to dwelle in the Lord God.

Blessid be the Lord ech dai; the God of oure heelthis schal make an eesie wei to vs.

Oure God is God to make men saaf; and outgoyng fro deeth is of the Lord God.

Netheles God schal breke the heedis of hise enemyes; the cop of the heere of hem that goen in her trespassis.

God, thei sien thi goyngis yn; the goyngis yn of my God, of my king, which is in the hooli.

In chirchis blesse ye God; blesse ye the Lord fro the wellis of Israel.

God, comaunde thou to thi vertu; God, conferme thou this thing, which thou hast wrouyt in vs.

legatis schulen come fro Egipt; Ethiopie schal come bifore the hondis therof to God.

Rewmes of the erthe, synge ye to God; seie ye salm to the Lord.

Singe ye to God; that stiede on the heuene of heuene at the eest. Lo! he schal yyue to his vois the vois of vertu, yyue ye glorie to God on Israel;

God is wondirful in hise seyntis; God of Israel, he schal yyue vertu, and strengthe to his puple; blessid be God.

The title of the eiyte and sixtithe salm. `In Ebreu thus, To the victorie, on the roosis of Dauid. `In Jerom thus, To the ouercomer, for the sones of Dauid. God, make thou me saaf; for watris `entriden til to my soule.

I traueilide criynge, my cheekis weren maad hoose; myn iyen failiden, the while Y hope in to my God.

God, thou knowist myn vnkunnyng; and my trespassis ben not hid fro thee.