Study Desk

In the dai of my tribulacioun Y souyte God with myn hondis; in the nyyt `to fore hym, and Y am not disseyued. Mi soule forsook to be coumfortid;

Y was myndeful of God, and Y delitide, and Y was exercisid; and my spirit failide.

Whether God schal caste awei with outen ende; ether schal he not lei to, that he be more plesid yit?

Ethir schal God foryete to do mercy; ethir schal he withholde his mercies in his ire?

And Y seide, Now Y bigan; this is the chaunging of the riythond of `the hiye God.

God, thi weie was in the hooli; what God is greet as oure God?

thou art God, that doist merueilis. Thou madist thi vertu knowun among puplis;

God, watris sien thee, watris sien thee, and dredden; and depthis of watris weren disturblid.

That thei sette her hope in God, and foryete not the werkis of God; and that thei seke hise comaundementis.

Lest thei be maad a schrewid generacioun; and terrynge to wraththe, as the fadris of hem. A generacioun that dresside not his herte; and his spirit was not bileued with God.

Thei kepten not the testament of God; and thei nolden go in his lawe.

And thei `leiden to yit to do synne ayens hym; thei excitiden hiye God in to ire, in a place with out water.

And thei temptiden God in her hertis; that thei axiden meetis to her lyues.

And thei spaken yuel of God; thei seiden, Whether God may make redi a bord in desert?

Therfor the Lord herde, and delaiede; and fier was kindelid in Jacob, and the ire of God stiede on Israel.

For thei bileueden not in God; nether hopiden in his heelthe.

and the ire of God stiede on hem. And he killide the fatte men of hem; and he lettide the chosene men of Israel.

In alle these thingis thei synneden yit; and bileuede not in the merueils of God.

And thei bithouyten, that God is the helper of hem; and `the hiy God is the ayenbier of hem.

And thei weren turned, and temptiden God; and thei wraththiden the hooli of Israel.