Study Desk

whi art thou sory, and whi troblist thou me? Hope thou in God, for yit Y schal knouleche to hym; he is the helthe of my cheer, and my God.

God, we herden with oure eeris; oure fadris telden to vs. The werk, which thou wrouytist in the daies of hem; and in elde daies.

Thou art thi silf, my kyng and my God; that sendist helthis to Jacob.

We schulen be preisid in God al dai; and in thi name we schulen knouleche to thee in to the world.

But now thou hast put vs abac, and hast schent vs; and thou, God, schalt not go out in oure vertues.

If we foryaten the name of oure God; and if we helden forth oure hondis to an alien God.

Whether God schal not seke these thingis? for he knowith the hid thingis of herte. For whi we ben slayn al dai for thee; we ben demed as scheep of sleyng.

Crist, thou art fairer in schap than the sones of men; grace is spred abrood in thi lippis; therfor God blessid thee withouten ende.

God, thi seete is in to the world of world; the yerde of thi rewme is a yerde of riyt reulyng, `ethir of equite.

Thou louedist riytfulnesse, and hatidist wickidnesse; therfor thou, God, thi God, anoyntide thee with the oile of gladnesse, more than thi felowis.

And the kyng schal coueyte thi fairnesse; for he is thi Lord God, and thei schulen worschipe hym.

The title of the five and fourtithe salm. To the ouercomere, the song of the sones `of Chore, `for yongthis. Oure God, thou art refuyt, and vertu; helpere in tribulacions, that han founde vs greetly.

The feersnesse of flood makith glad the citee of God; the hiyeste God hath halewid his tabernacle.

God in the myddis therof schal not be moued; God schal helpe it eerli in the grey morewtid.

Hethene men weren disturblid togidere, and rewmes weren bowid doun; God yaf his vois, the erthe was moued.

The Lord of vertues is with vs; God of Jacob is oure vptakere.

Yyue ye tent, and se ye, that Y am God; Y schal be enhaunsid among hethene men; and Y schal be enhaunsid in erthe.

The Lord of vertues is with vs; God of Jacob is oure vptakere.

The title of the sixte and fourtithe salm. To victorie, a salm to the sones of Chore. Alle ye folkis, make ioie with hondis; synge ye hertli to God in the vois of ful out ioiyng.

God stiede in hertli song; and the Lord in the vois of a trumpe.