Study Desk

But for fornycacioun eche man haue his owne wijf, and ech womman haue hir owne hosebonde.

The womman hath not power of hir bodi, but the hosebonde; and the hosebonde hath not power of his bodi, but the womman.

Nyle ye defraude eche to othere, but perauenture of consent to a tyme, that ye yyue tent to preier; and eft turne ye ayen to the same thing, lest Sathanas tempte you for youre vncontynence.

But Y seie this thing as yyuyng leeue, not bi comaundement.

For Y wole, that alle men be as my silf. But eche man hath his propre yifte of God; oon thus, and another thus.

But Y seie to hem, that ben not weddid, and to widewis, it is good to hem, if thei dwellen so as Y.

But to hem that ben ioyned in matrymonye, Y comaunde, not Y, but the Lord, that the wijf departe not fro the hosebonde;

But to othere Y seie, not the Lord. If ony brother hath an vnfeithful wijf, and sche consenteth to dwelle with hym, leeue he hir not.

For the vnfeithful hosebonde is halewid bi the feithful womman, and the vnfeithful womman is halewid bi the feithful hosebonde. Ellis youre children weren vncleene, but now thei ben hooli.

But as the Lord hath departid to ech, and as God hath clepid ech man, so go he, as Y teche in alle chirchis.

Circumcisioun is nouyt, and prepucie is nouyt, but the kepyng of the maundementis of God.

Thou seruaunt art clepid, be it no charge to thee; but if thou maist be fre, `the rather vse thou.

But of virgyns Y haue no comaundement of God; but Y yyue counseil, as he that hath mercy of the Lord, that Y be trewe.

But if thou hast takun a wijf, thou hast not synned; and if a maidun is weddid, sche synnede not; nethelesse siche schulen haue tribulacioun of fleisch.

But Y spare you. Therfor, britheren, Y seie this thing, The tyme is schort. Another is this, that thei that han wyues, be as thouy thei hadden noon;

But Y wole, that ye be without bisynesse, for he that is without wijf, is bisi what thingis ben of the Lord, hou he schal plese God.

But he that is with a wijf, is bysy what thingis ben of the world, hou he schal plese the wijf, and he is departid.

And a womman vnweddid and maidun thenkith what thingis ben of the Lord, that sche be hooli in bodi and spirit. But sche that is weddid, thenkith what thingis ben of the world, hou sche schal plese the hosebonde.

And Y seie these thingis to youre profit, not that Y caste to you a snare, but to that that is onest, and that yyueth esynesse, with outen lettyng to make preieris to the Lord.

For he that ordeynede stabli in his herte, not hauynge nede, but hauynge power of his wille, and hath demed in his herte this thing, to kepe his virgyn, doith wel.